Naaalala kita sa hampas ng tunog na nagmumula sa may dalampasigan‬

Tayo ay nasa ilalim ng bughaw na kalangitan

Habang tayo ay nag lalaro sa may buhanginan

Tila’y napaka-sarap lahat balik-balikan

 

Sa pag bukang liwayway

Tayo’y mag kahawak-kamay

Sumasabay sa pag sayaw ng tubig alat

Minsa’y sinasalubong ang mga malalaking alon sa dagat

 

Ang sikat ng araw ay tirik na tirik na

Ngunit mas pinili natin lumusong sa gitna ng karagatan

Magkatalikuran sa lumang gulong na salbabida

Habang tayo ay nakababad sa may initan

 

Patuloy na sumisipa sa ilalim ang ating mga paa

Habang sinusulit ang bawat minutong kasama ang isa’t isa

Ni hindi natin alam kung saan tayo papunta

Siguro nga ang nasa isip na lang ay “bahala na”

 

Ayan na, andyan na ang paglubog ni haring araw

Na ang ibig iparating ay tapos na ang mga sandaling ninakaw

Paalis na, sa lugar kung saan ay inakala kong akin ka

Palayo sa mga alaalang nabuo na tanging ako na lang ang nakakaalala.